يوجد فى مصر فقط علامة مصرية مميزة

حرف وكلمة

ثلاث صور الأولى لطفلة فى الخامسة من عمرها رقيقة ناعمة أحبها كما أحب اولادى ساعدتها فى نطق أولى الحروف والكلمات فى حياتها القصيرة فهى مصابة بالشلل الدماغى وأنا اخصائية تخاطب
عندما رأيتها لأول مرة لم أستطع أزالة عيناى عن وجهها وصممت أن أبذل معها كل طاقتى وعلمى وخبرتى لأساعدها ع أن تتكلم وبالفعل تنادينى الأن بأسمى ووضعت لنفسى وقتا كان من المسشتحيل أن اتم فية هدفى والحمد للة أستطعت وحطمت مع والدتها المستحيل
الصورة الثانية لطفلة أخرى جائتنى والدتها تبكى وتسألنى هل تستطيع طفلتها أن تتعامل مع من حولها دون صراخ وهل يمكننى أن أساعدها كى تندمج فى الحياة العامة دون مشكلات تسببها ونظرت للطفلة فوجدتها وقد تمتعت بجمال ربانى ووجة هادئ ممتلئ وتسائلت كيف هو الحال لو كانت صحيحة العقل ؟ وشخصت حالتها ع أنها مصابة بالتوحد وبالفعل بدأت العمل معها وأعطيت لنفسى مهلة فالعمل مع تلك الحالات يستغرق وقتا والحمد للة أيضا صورتها تلك فى عيد ميلاد أبنى حيث كفت عن الصراخ وتنطق بعضص الكلمات وتجلس معى الساعة تلو الأخرى دون أعتراض وهأنذا أفرح ويمتلأ قلبى سعادة حين أرى طفلتى هاتين وهما يحتضاننى بمودة وحب ونقاء
الصورة الثالثة لأطفالى أصحاء بلا مشاكل عقلية ولا نفسية
وضعت الصور الثلاث والحكايات الثلاث لأاسأل كل من يقرأ مدونتى سؤال
كم من النعم أعطاها لنا اللة لا نشعر بها ولا نقدرها ؟؟؟
وكم من الكلمات نقولها ونجرح بها الأخرين دون شعور بمعنى الكلمة ولا أهميتها
الكلمة لدى البعض مجرد كلمة ولدى البعض الأخر هبة من اللة
كم مرة صرختم فى أطفالكم ليصمتوا ؟وكم مرة تمنيت أن يكف طفلك عن اللعب والحركة ؟
شاهدوا الصور وأشكروا معى اللة

هل يمكن لأحد ان يجيبنى ما الذى يحدث لأطفالنا فالعراق وفلسطين والفالوجة ودارفوربين نيران الحرب والجوعوالأغتصابات المتعددة للفتيات والفتيان والتى اصبحت من عناوين الاخبار والبرامج بمصر والعالم العربى وحتى الاطفال بقرى الدقهلية فى ازمة نقص المياة الحادة التى يعانون منها

وأين منظمات حقوق الأنسان لتحمى اطفالنا ومستقبل بلادنا

صرخة لكل مدون انشروا مذابح الاطفال داخل مصر وخارجها

ولتعلوا اصواتنا بصرخة استغاثة لانقاذ اطفال الوطن العربى تعالوا لنكون قوة ضد الظلم وقتل وتجويع وتشريد الاطفال فمن لأطفالنا بعد اللة سوانا ؟؟

http://arabblogcount.blogspot.com/2007/02/blog-post.html
لكل من يريد تصفح المدونات المصرية موقع شامل لكل المدونات رائع جدا

جميلة رقيقة ناعمة لم تتعد عامها الثالث بعد تتحدث بلغة الكبار وتفكر مثل كل الاطفال بعمرها تطلعت لصورها التى تعبر عن كل معانى البراءة والجمال وخلو البال وتساءلت عن مستقبلها الذى هو بيد اللة ياصغيرتى ليتنى ظللت مثلك فى نفس عمرك ليتنى ما تمنيت ان تمضى بى السنون لأفهم والأحظ وأتألم وأفرح ليتك يا صغيرتى الجميلة تعلمين أنك يوما ما ستصبحين مثلى ومثل الكثيرين ممن يتمنون أن يظلوا أطفال يلبسون كما يريدون ويقررون مصائرهم بأيديهم

لبستى يا صغيرتى الخمار وضحكتى بأبتسامة بريئة صافية

تركتى شعرك منسدلا وضحكتى بأبتسامة أكثر صفاءا ورقة

سأترك صورتك هنا فى مدونتى ويوما ما بعد سنين طويلة حين تكبرين وتختارين ع اى صورة ستكونين سنتكلم

واسمعك بعين العمر والخبرة يا صغيرتى والسنين تقولين

ياريتنى فضلت كدة صغيرة ياريتنى ما كبرت ابدا

فاطمة بنوتة اماراتية وعدتها فيوم انى احكى قصتها للعالم كلة زرتها كتير فسجنها وشفت دموعها اللى مبتنزلش ابدا وشفت قوتها اللى هتفط من بين عيونها وتعرفوا كل ما تحصلى مشكلة او اخاف ااقع افتكرها ولازم تفتكروها معايا
بنت جميلة رقيقة بشعر اسود طويل وابتسامة عذبة وعيون قوية حبت
قلبها دق
طب واية المشكلة ؟؟
المشكلة انها اماراتية وحبت باكستانى واتجوزتة برغم رفض اهلها وسافرت معاة بلدة باكستان وعاشت احلى 4 سنين فعمرها وخلفت ولد زى القمر زيها وكان عندها بيت بجنينة واهل زوجها طيبين قوى معاها
دايما بتكلم امها بس وصلتها تقريبا مقطوعة بأخواتها وفجأة عرفت ان مامتها تعبانة راحت السفارة بتاعتها فباكستان وطلبت ترجع بلدها مع زوجها تشوف مامتها وكانت حامل فطفلها التانى ووافقت السفارة واخدوها فطيارة مخصوص وفرحت فاطمة ببلدها واحترامهم ليها ورجعت وبمجرد نزولها المطار وبرغم زواجها الرسمى فباكستان وبرغم ان زوجها مسلم وهى مسلمة اخدوها المخابرات وحققوا معاها عشر ساعات واعتقلوها هى وزوجها وطبعا دخلت السجن مع ابنها 4 سنوات وهى حامل وحاكموها بتهمة الزنا لانها لم تتزوج داخل البلاد ؟؟ تتصوروا
وعاشت لغاية اخر مرة شفتها سنة فالسجن خلفت ابنها التانى وكل يوم محاولات تخرج مفيش فايدة وزوجها اتسجن سنة ورحلوة باكستان وهى بين نارين سافرى برة البلد وسيبى بسبورك وهنشيل عنك الجنسية او اقعدى من غير ولادك ونرحلهم لابوهم
ورفضت فاطمة كل الحلول واصرت ع موقفها
انتى فين يا فاطمة واخبارك اية بجد وحشتينى
انا قلتلها انتى مش اماراتية انتى ست مصرية قوية
ياريت لو حد شاف فاطمة او عرفها او يعرف اخبارها يقولى
وحشتينى يا فاطمة
ووحشتنى كل واحدة قوية مصرية او غير مصرية بتقول للظلم لأ لألأ
تعالوا نبقى كلنا فاطمة

لية كلنا عاوزين نسيب بلدنا ونخلع

دايما بسأل نفسى السؤال دة وبرغم انى واحدة من اللى خرجوا لسنين مش طويلة برة مصر بس فعلا فالنهاية ملناش غير مصر مش كلام شعارات ولا حاجة واللة بس تعرفوا عندنا فقر ومشاكل فحقوق الانسان وقضايا وسيطرة رأس مال ورجال اعمال واختفاء تدريجى للطبقة المتوسطة ومشاكل معتقلين وسجون وسرقة وهليبة بس فالنهاية انزلوا معايا الشارع وشوفوا ع الكورنيش وفصحارى الهرم والشوارع وع نواصى الحوارى برغم كل شئ لسة الناس بتضحك بغلاسة ومن تحت ضرسها بس بتضحك وبتجرى عليك لو تعبان وتلاقى مية واحد وواحدة بتعرض المساعدة واول ما تحصلك مشكلة وتقول فاللى تاعبك او ظلمك حسبى اللة ونعم الوكيل تلاقية عيونة اتغيرت وكأنك حطيت علية مية نارر

لية برغم كل مساؤى بلدنا اللى عمالين نطحن فيها ونلوكها بأسنانا مش شايفين جمالها وبساطتها

تعرفوا احنا تعبانين لية

اقولكم

الحرامية فكل مكان والسجون والمعتقلات فكل حتة والمناخ السياسى بايظ ع مستوى العالم كلة والديمقراطية بتحتضر من سنين فكل الدنيا بس هنا عندنا احنا اللى صوتنا عالى ومخنا ذكى اكتر من اللازم مش بيقولوا الغباء لية فوايدة

انا رحت بلاد كتير وشفت جنسيات اكتر وسألتهم عن بلادهم كل الناس عندها نفس المشاكل وكل المجتمعات فيها اللى عندنا واكتر بس احنا اللى بنصرخ بصوت عالى صحيح الحكومة مزوداها معانا شوية بس لية مش قادرين نقدر اننا كتتتتيييررر قوى وبجد قوى

طب ممكن نحاول نتفق ع حاجة صغنونة

هو لو عملنا جمعيات لنظافة الشوارع وجمعيات للتشجير وجمعيات لحل مشاكل الشباب والجرى ورا المسئولين من مكتب لمكتب وجمعيات للتكافل الاجتماعى وعمل احصائيات بكل شارع وبيت فية اسرة غنية ممكن تشارك فأعالة أسرة فقيرة مش دة يبقى احسن من النقد عمال ع بطال ودخول المعتقلات

احنا شباب وشبابنا امانة وحرام نضيعة عشان مش قادرين نعمل حاجة غير اننا نكتب ساعدونى ويالا نفكر نساعد بلدنا ازاى ونعبر عن رأيينا ازاى وبرضة مفيش مانع نقول لا لكل الفساد بس بلاش نهاجر ونجرى ورا حلم السفر وان سافرنا خلينا نسافر عشان نشتغل مش عشان كارهين بلدنا وخلاص

خدوا بالكم منكم
امضاء
واحدة منكم