دايما بسأل نفسى السؤال دة وبرغم انى واحدة من اللى خرجوا لسنين مش طويلة برة مصر بس فعلا فالنهاية ملناش غير مصر مش كلام شعارات ولا حاجة واللة بس تعرفوا عندنا فقر ومشاكل فحقوق الانسان وقضايا وسيطرة رأس مال ورجال اعمال واختفاء تدريجى للطبقة المتوسطة ومشاكل معتقلين وسجون وسرقة وهليبة بس فالنهاية انزلوا معايا الشارع وشوفوا ع الكورنيش وفصحارى الهرم والشوارع وع نواصى الحوارى برغم كل شئ لسة الناس بتضحك بغلاسة ومن تحت ضرسها بس بتضحك وبتجرى عليك لو تعبان وتلاقى مية واحد وواحدة بتعرض المساعدة واول ما تحصلك مشكلة وتقول فاللى تاعبك او ظلمك حسبى اللة ونعم الوكيل تلاقية عيونة اتغيرت وكأنك حطيت علية مية نارر
لية برغم كل مساؤى بلدنا اللى عمالين نطحن فيها ونلوكها بأسنانا مش شايفين جمالها وبساطتها
تعرفوا احنا تعبانين لية
اقولكم
الحرامية فكل مكان والسجون والمعتقلات فكل حتة والمناخ السياسى بايظ ع مستوى العالم كلة والديمقراطية بتحتضر من سنين فكل الدنيا بس هنا عندنا احنا اللى صوتنا عالى ومخنا ذكى اكتر من اللازم مش بيقولوا الغباء لية فوايدة
انا رحت بلاد كتير وشفت جنسيات اكتر وسألتهم عن بلادهم كل الناس عندها نفس المشاكل وكل المجتمعات فيها اللى عندنا واكتر بس احنا اللى بنصرخ بصوت عالى صحيح الحكومة مزوداها معانا شوية بس لية مش قادرين نقدر اننا كتتتتيييررر قوى وبجد قوى
طب ممكن نحاول نتفق ع حاجة صغنونة
هو لو عملنا جمعيات لنظافة الشوارع وجمعيات للتشجير وجمعيات لحل مشاكل الشباب والجرى ورا المسئولين من مكتب لمكتب وجمعيات للتكافل الاجتماعى وعمل احصائيات بكل شارع وبيت فية اسرة غنية ممكن تشارك فأعالة أسرة فقيرة مش دة يبقى احسن من النقد عمال ع بطال ودخول المعتقلات
احنا شباب وشبابنا امانة وحرام نضيعة عشان مش قادرين نعمل حاجة غير اننا نكتب ساعدونى ويالا نفكر نساعد بلدنا ازاى ونعبر عن رأيينا ازاى وبرضة مفيش مانع نقول لا لكل الفساد بس بلاش نهاجر ونجرى ورا حلم السفر وان سافرنا خلينا نسافر عشان نشتغل مش عشان كارهين بلدنا وخلاص
خدوا بالكم منكم امضاء
واحدة منكم
Falling hearts Here
1 comment:
كلامك جميل جدا ولكنه للأسف من خارج الصوره ... أنا لا أقول أنني من المطحونين بالعكس في وظيفة يتمناها أي شاب وأسكن بمنطقة من أرقى المناطق ولكن عند أول فرصة سآخـــذ وليدتي الصغيرة وزوجتي ووالدي وأخوتي .... ستسأليني عن السبب ... السبب يطول شرحه من ضمن الأمثله ما حدث لمعلمك اللغة الإنجليزيه إبن خالتك الذي تحدثت عنه ... وغيره ... صدقيني الحال أصبح لا يطاق ... لم يظهر الفساد في البر والبحر فقط ولكنه في كل مكان ..... عموما نظرتك لتغيير الاوضاع أعذريني خيالية ... الشعب الذي تهان كرامته كل يوم وتباع بلده قطعة قطعة ولا يفعل شيئا ...لا يستحق الحياة .......
.......
وبرغم كل شيء مصر حتفضل عزيزة على
تحياتي لك ولبنتك الجميلة
Post a Comment