يرتفع صوت المؤذن فأصحوفجأة اتمتم ببعض ايات القرأن والأذكارويتناهى لسمعى صوت المصلين فى الجامع الملاصق لمنزلى فأقوم للصلاة مسرعة وبمجرد أنتهائى انظر للشارع والجامع من خلال الشرفة لأجد مجموعة من السيدات يحملن فوق رؤؤسهن الأقفاص الفارغة متجهين الى سوق الجملة لشراء بضاعة لبيعها فى السوق القريب من منزلنا
يتناهى الى سمعى كلمات مثل الحمد لله توكلنا ع الله يارب الرزق عندك ومنك
اعود للنوم وادعو لهم ان يصيبوا خيرا فى يومهم
اصحو للذهاب لعملى بعد ساعات
انزل للشارع
استمع لنفس النسوة من الصباح يتكلمون بصوت عال وينادون ع بضاعتهم
وما بين النداء والنداء يتجاذبون اطراف الحديث مع النساء اللاتى يشترين منهن
فلانة اة بنت فلان دى بت مش مضبوطة ماشية ع حل شعرها
اة ابن ابو فلان الواد دة مش كان اتجوز واطلق
لا لا انتى هتفاصلى روحى ياولية فداهية يلعن ابو ديك ال......الخ
اسبلك الدين يالا ولا تمشى من قدامى
اردد فى سرى سبحان مغير الأحوال
اركب سيارة أجرة للذهاب لعملى
استمع للسائق بجانبى وهو يحكى مع راكب بجوارى
والله وما ليك علية يمين انا طلعتلها السنجة وكنت هاقتلها واشق بطنها بس هى اتلمت بدرى دانا كنت بلطجى زمان
بس تعرف ملقيتش غير بيت ربنا لمنى بعد ما اتجوزت الحمد لله
دانا ياما بهدلت نسوان وضربت رجالة
واتسجنت 5 سنين ولا كانت بتفرق عندى
بس والنبى الهدي حلو يابية
ربنا يخليهالى الولية مراتى
الأجرة يابية
اتحرك بعد دفع الأجرة وأردد
سبحان مغير الأحوال
اسير مسرعة لعملى أجد المديرة تردد
اهلا ياحبيبتى اتأخرتى لية
أسفة يا فندم والله المواصلات سامحينى
لا ياحبيبتى عادى
كمان الاذن بتاع امبارح مسجلتوش خدية معاكى اهوة
شكرا اردد
نيرمين
متنسيش الكتب بتاعة الاعدادية بتاعة بنتك محتاجها لما تخلص
حاضر انشاء الله
نيرمين
نعم
ولو معاها شوية لبس يبقى تسلميلى صغروا عليها يعنى
حاضر انشاء الله
ادخل مسرعة لمكتبى وانا فى قمة الغضب
بعد دقائق
نيرمين
تنادى رئيس شئون العاملين
انتى روحتى بدرى امبارح
ايوة وعملت أذن والمديرة وافقتلى
الله يسامحها
اردد لية فية اية
بعد ما مشيتى قلبت الدنيا وخبت الأذن وقعدت تزيد وتعيد عليكى بتتأخر الصبح وبتمشى بدرى وبهدلت الدنيا
هههه اضحك فى سرى طب ولية مثبتتش الأذن انا ماشية رسمى ودة حقى القانونى
تنظر لى مديرة شئون العاملين بخبث
معرفش شوفى عاوزة منك اية
ههههه اضحك عادى خليها تضرب وتلاقى مش هتلاقى الا الطناش منى
اتركها واردد
سبحان مغير الاحوال
زميلة لى تقرأ فى المصحف وتتمتم بأدعية
نيرمين فطرتى
لا شكرا مش بفطر
طيب براحتك
زميل لى ينادى على
نيرمين عندكوا سكر عاوزين نعمل شاى
ايوة تعال واتوجة لزميلتى حامله القرأن
ابلة من فضلك كان فية هنا كيس سكر انا جايباة من فترة
اة اهوة تردد هى
طب عاوزة نصة للولاد فوق
لا سيبك منهم اللى عاوز يروح يشترى
ياستى مترديش سائل همة مش محتاجين بس الموجود عندك كتير ومفيش مشكلة نديهم
نيرمين تنطق اسمى بصوت جهورى
امبارح تجيبى فطار لنا وتتطلعى الدور التانى تقولى انة عندنا فطير مشلتت تلميلنا الدور كلة والنهاردة السكر
طب وفيها اية دا الاكل بيزيد بأجتماع الناس مش بينقص اردد انا
لا ياستى ترد/انا مبحبش لا اسلف ولا ااكل حد
اخذ كيس السكر واتوجة للباب لأعطية لزميلى وأردد
سبحان مغير الأحوال
اترك عملى وأتوجة لتاجر كنت قد تحدثت معة حول بضاعة لشرائها منة
مساء الخير يا فندم
اهلا يا استاذة
اخبار البضاعة اية
انا زعلان منك جدااااا
لية فية اية
قلتى لبنت عمك انك هتشترى منى وسايبالى عربون
طب ودة فية اية مش فاهمة
لا ابدااا اصل هى اتصلت واتخانقت معايا انا بصراحة فهمت انها غيرانة منك لأنها طلبت تشاركنى فالبضاعة قبل كدة وانا رفضت
اردد انا طيب وانا مالى انا علاقتى بيك شغل علاقتك بيها انك عاوز تتجوزها انا مالى باللى بينكم
لا مفيش بس هى اتخانقت وحذرتنى اتعامل معاكى قالت انك عصبية وشديدة ومش هتفوتى غلطة لو حصل خلاف
اردد بص يا استاذ انا مبحبش العلاقات المتشابكة الشغل شغل وانا مليش فالدوشة اقولك بلاها البضاعة شكرا سلام
لا طيب انتى زعلتى
اردد لا ابدا بس انا مبحبش الكلام الكتيربدون فايدة
طب ياريت متقوليلهاش انى قلتلك حاجة
لا متقلقش ربنا يهدى الجميع بكرة هعدى اخد فلوسى مقدم البضاعة وشكرا
سلام
سلام
واردد بهمس سبحان مغير الاحوال
الموبيل يرن
ايوة ازيك ياحبيبى
اهلا ياحبيبتى اخبارك اية
بخير الحمد لله
اية مكلمتنيش لية امبارح
نمت بدرى اسف بجد
هههههه اضحك نمت بدرى ولا خرجت مع صحابك
لا نمت بدرى انتى مش مصدقة لية
واسمع وصلة من الصوت العالى والاتهامات بنقص الثقة والشك وبأنى مبصدقش الا نفسى
اصمت واردد اسفة طيب لما تقعد ع النت رنلى سلام عشان انا مروحة من الشغل
طيب ياحبيبتى سلام
انظر للموبيل فى يدى
الله يسامحك يا طارق/صديق مشترك لنا لا أثق بة كثيرا /
اتصلت مخصوص امبارح عشان تطلب ورق خاص بالشغل وتقولى انكم فالسينما سوا انت وهوة
ودلوقتى بيكدب علية ياترى كنتم مع مين وفين خروجة عزابى ولا تشكيل
اتمتم سبحان مغير الاحوال
ماما ماما سماح هنا
امى /لا مش عاوزة اقابلها
ماما انتى حاجة بيت الله انزلى للبنت جايالك عاوزاكى فمشكلة
امى /دى بنت قليلة الادب بتتخانق ع ورثها وابوها لسة مماتش وعيان
ياماما البنت بتقول ان اخوكى كتب الارض والبيت بأسم مراتة الأولى وساب سماح عشان من زوجة تانية
خرجها من الميراث ودى جاية تستنجد بيكى
أمى /كذابة انا سألت اخويا قاللى وحلفلى انة معملش كدة تنادى بصوت عالى تسمعة سماح
قوليلها تروح تلف ع الناس
ترفع قضايا
تروح للعمدة
خليها تشوف هيعملها اية دى فضحتنا وانا مش عاوزاها فبيتى أخويا مبيكدبش فهميها كدة ورثها محفوظ واخويا مبيكدبش
انزل لأرى الدموع ع وجة سماح
تردد طب قوليلى اعمل اية يا بنت عمتى والنبى اروح للعمدة مش عاجبهم اجى لعمتى تطردنى والله كتب وبيكدب ع عمتى
اردد معلش ياسماح اصبرى لما العيا يخف من علية وروحى دلوقتى وانا بعدين هكلمها
اقبلها وتمشى ودموعها تسبقها
بعد ايام يموت خالى
بعد شهر من الوفاة
ماما مالك رايحة فين كدة
شفتى يانيرمين شفتى اخويا كدب علية ومنع البنت سماح الغلبانة من الميراث ربنا يسامحة
طب وانتى رايحة فين
رايحة للعمدة يشوفلة حل او نرفع قضية دة حق ولايا وانا مش هسيبة
انظر لها واردد
سبحان مغير الأحوال
لماذا نتعمد الكذب والمراوغة ويصبح ظاهرنا غير باطننا
لماذ اصيب المجتمع بهذا المرض الخطير من الكذب وهتك الاعراض ع الارصفة والطرقات
لماذا لم نعد نملك تلك الطاقة من الصدق والصراحة واحترام الاخرين
لماذا اصبح قليل الادب رمز وسئ السمعة مثل
واخيرا لماذا فقدنا الحب والتسامح والرقة وحب مساعدة الأخرين بداخلنا
اسئلة تؤرقنى وتجعلنى دوما انظر امامى وخلفى خوفا من طعنات البشر
Falling hearts Here
15 comments:
دعوة
الي احبائي
واخوتي واخواتي المدونين
اتمني منكم
التفكير في تلبيه الدعوة المسجله بمدونتي
عارف اني عامل قائمة خاصة بس دول بس اللي اعرفهم
اتمني تتحول الحفله لملحمه تعريف راقيه ومكيفة
طبعا مهي هتبقي بالمركز الفرنسي انا اتاكدت من المعاد وهتاكد تاني
http://ramezabas.blogspot.com/
ودة لينك مدونتي المتواضعه
اتمني منكم الاهتمام بمشاركتي فرحتي
بالمعاقين سمعيا مثلي
وهم فرقه الصامتين
التي يديرها صديقي المخرج رضا
هى دى الناس بيقولوا كلام وتصرفاتهم حاجة تانية مااسهل القول ومااصعب الفعل
تحياتى لكى ياقمر
ذ
ربنا يهدي
دا القاسم المشترك الاعظم في كل اللي قلتيييييه
بس بجد نماذج موجوده تثير الجنوووووووووووون
فى كذا مثل جم على بالى و انا بقرا كلامك
ساعة لربك و100 ساعة لقلبك
ان كان لك عند حد حاجة قوله يا سيدى
عض قلبى ولا تعض رغيفى
الزوجة اخر من يعلم
انا و اخويا على ابن عمى و انا و ابن عمى على الغريب
اعتقد دى طباع الناس من زمان بس يمكن علشان دلوقتى الناس بقت اكتر و الحال اصعب ظهرت السلبيات اكتر من الاول اللى هى كانت زمان الواحد يخاف يجهر بها
و سبحان مغير الاحوال
موش عارفة اقولك إيه يا نرمو
الدنيا مليانة بالتشوهات دى
بس المؤلم إنها تتجمع كلها على الصبح كدا
و مرة واحدة
أنا عندى غنوة على المدونة مشغلها مخصوص ليكى
يا رب تعجبك
تحياتى
عرضت نماذج مختلفه من البشر ...ربنا يهديهم
أولادك زي العسل_ماشاء الله_ ربنا يخليهم لك
تحياتي
عادى جدا يا نرمين بتحصل كتير والدنيا دى فيها كام بلياتشو بيتلون ومن تحت الالوان والاقنعه شكل تانى خالص
----------------
انا شدتنى مشكلة بنت خالك ااقولك ايه الى ممكن يتعمل تروح تشوف ليها محامى يرفع قضيه اسمها ( بطلان تصرف )تطلب فيها الغاء تصرفات والدها على اساس انها تمت فى فترة مرض الموت ودى كل التصرفات الى فيها بتكون باطله حيتلغى بيع الارض ويتعاد تقسيم التركه من تانى ودى اثباتها سهل عن طريق الشهادات والروشتات وشهاده الشهود انى والدها كان مريض واتوفى فى فتره المرض
ولو احتجتى اى حاجه او معلومه او استشاره اميلى فى البروفيل
السلام عليكم
انا طائر حزين شكرا جزيلا على مرورك عندى وترك تعليق قيم اتشرف به. على فكرة النماذج اللى انت عرضتيها هى دى الاغلبية ولو فكرتى شوية هتلاقى ان كل الناس بتعمل كدة حتى انا ساعات كتير باكون كدة من غير مأقصد مع اختلاف النوايا. انا عرفة ان صعب حد يعترف ان فية عيب معين بس قمة الشجاعة هى نقد النفس قبل نقد الغير
للأسف يا عزيزتى ده اغلب حال المسلمين للاسف الدين كلام و بس كلام و نيجى عند الفعل و نستهبل
بس لحد امتى حنستهبل الله اعلم
تحياتى
حقيقي كتير مننا كده و ساعات احنا نفسنا بنعمل نفس التصرفات دون ان ندري ..
لكن اكثر شىء بنفقده احترامنا لنفسنا مع الوقت .. انا بكدب يبقى انا خايفة و مش قادرة اواجه نفسي و بالتالى يوم بعد يوم مش حيكون جوايا احترام لذاتى
دمتي بكل ود و خير
ازيك يانرمين
دا واقع فى حياتنا للاسف
بنقول حجات ونعمل العكس
بننادى بمبادىء واحنا اول الناس اللى بنخالفها
ربنا يرحمنا يارب
تحياتى اختى الجميله
اخيكى
احمد سكر
عزيزتي كلاكيت
لو وجهت سؤالا إلى مجموعة من الناشئين: من هو اللنبي؟ فغالبا سيردوا عليك كما حدث معي قائلين ، محمد سعد، غير واعين بوجود شخص في التاريخ اسمه ادموند اللنبي، هو من قاد قوات الحملة المصرية ليحتل فلسطين و سوريا ابان الحرب العالمية الأولى، هذا يجيب على سؤالك، الصياعة و المخدرات أصبحت كاركتر نقدمه للشباب، فماذا ننتظر؟
تحياتي و تقديري للبوست و كاتبته
هى دى النفس البشريه يا نرمين
يعنى ربنا خلقنا كده مش جديدة ما بين اننا تغير بس الافضل اننا نتغير للاحسن
السلام عليكم
اختى فى الله نرمين لقد تركت عندى تاج لك اتمنى ان تمرى تأخذيه ولكى جزيل الشكر
اعزائى لكل من علق ع هذا البوست اشكر لكم جميعا تعليقاتكم ولن استطيع الرد عليها جميعا نظرا لأنشغالى مع ابنتى بأمتحانات الأعدادية أدعوا لها ولى ههههه اشكر حسن تواصلكم ونورتونى جميعااااااااااا بلا استثناء
تحياتى
Post a Comment