نعم مطلقة ولما اخجل؟؟؟؟؟؟

رائعة هى برقتها التى عهدتها فيها جميلة كلماتها ضعيفة مستكينة ولكنها تحمل تحت طياتها قلباو روحا تملؤها الشفافية والرومانسية انها فوضى الحواس او أريج السمر أو ترانيم الشتاء أو انا وهى تلك أسماء مدوناتها التى أستغرقتنى قراءتها استغراق الهائم بحلم الحب الجميل والمشاعر الرائعة تلك الأنثى بداخلها والتى تعلن الرفض بصوت خافت قررت اخيرا ان تقول للظلم لا للأستكانة لا قررت أن تبدأ حياتها دفعة واحدة بلا تردد وتطالب بكل حق لها أغتصب وكل مشاعر لها امتهنت
قررت اخيرا الخروج من عزلتها ومشاركتى فى وليدتنا الجديدة
مدونتنا معاااااااااااااا
نعم مطلقة ؟......ولما اخجل
http://motalaka-with-out-fear.blogspot.com/
والجروب الخاص بنا ايضا ع الفيس بوك بنفس الأسم والمضمونhttp://www.facebook.com/group.php?gid=24205381223

انها صرخة منا سويا ع كل الأوضاع المتردية للمطلقات
صرخة فى وجة الظلم والعدوان والحقوق المسلوبة والجروح المتراكمة
انها خطوات نحو الحرية خطوات نحو التحرر من ذكريات الماضى الأليمة والنظر بأمل ونجاح للمستقبل
أنها أنااااااااااا كلاكيت وهى اريج السمر
انها سمر ونيرمين
انها مطلقة ومطلقة
ولا نخجل
نعم لماذا نخجل ....؟؟؟؟؟؟؟

سبحان مغير الاحوال

يرتفع صوت المؤذن فأصحوفجأة اتمتم ببعض ايات القرأن والأذكارويتناهى لسمعى صوت المصلين فى الجامع الملاصق لمنزلى فأقوم للصلاة مسرعة وبمجرد أنتهائى انظر للشارع والجامع من خلال الشرفة لأجد مجموعة من السيدات يحملن فوق رؤؤسهن الأقفاص الفارغة متجهين الى سوق الجملة لشراء بضاعة لبيعها فى السوق القريب من منزلنا

يتناهى الى سمعى كلمات مثل الحمد لله توكلنا ع الله يارب الرزق عندك ومنك

اعود للنوم وادعو لهم ان يصيبوا خيرا فى يومهم

اصحو للذهاب لعملى بعد ساعات

انزل للشارع

استمع لنفس النسوة من الصباح يتكلمون بصوت عال وينادون ع بضاعتهم

وما بين النداء والنداء يتجاذبون اطراف الحديث مع النساء اللاتى يشترين منهن

فلانة اة بنت فلان دى بت مش مضبوطة ماشية ع حل شعرها

اة ابن ابو فلان الواد دة مش كان اتجوز واطلق

لا لا انتى هتفاصلى روحى ياولية فداهية يلعن ابو ديك ال......الخ

اسبلك الدين يالا ولا تمشى من قدامى

اردد فى سرى سبحان مغير الأحوال

اركب سيارة أجرة للذهاب لعملى

استمع للسائق بجانبى وهو يحكى مع راكب بجوارى

والله وما ليك علية يمين انا طلعتلها السنجة وكنت هاقتلها واشق بطنها بس هى اتلمت بدرى دانا كنت بلطجى زمان

بس تعرف ملقيتش غير بيت ربنا لمنى بعد ما اتجوزت الحمد لله

دانا ياما بهدلت نسوان وضربت رجالة

واتسجنت 5 سنين ولا كانت بتفرق عندى

بس والنبى الهدي حلو يابية

ربنا يخليهالى الولية مراتى

الأجرة يابية

اتحرك بعد دفع الأجرة وأردد

سبحان مغير الأحوال

اسير مسرعة لعملى أجد المديرة تردد

اهلا ياحبيبتى اتأخرتى لية

أسفة يا فندم والله المواصلات سامحينى

لا ياحبيبتى عادى

كمان الاذن بتاع امبارح مسجلتوش خدية معاكى اهوة

شكرا اردد

نيرمين

متنسيش الكتب بتاعة الاعدادية بتاعة بنتك محتاجها لما تخلص

حاضر انشاء الله

نيرمين

نعم

ولو معاها شوية لبس يبقى تسلميلى صغروا عليها يعنى

حاضر انشاء الله

ادخل مسرعة لمكتبى وانا فى قمة الغضب

بعد دقائق

نيرمين

تنادى رئيس شئون العاملين

انتى روحتى بدرى امبارح

ايوة وعملت أذن والمديرة وافقتلى

الله يسامحها

اردد لية فية اية

بعد ما مشيتى قلبت الدنيا وخبت الأذن وقعدت تزيد وتعيد عليكى بتتأخر الصبح وبتمشى بدرى وبهدلت الدنيا

هههه اضحك فى سرى طب ولية مثبتتش الأذن انا ماشية رسمى ودة حقى القانونى

تنظر لى مديرة شئون العاملين بخبث

معرفش شوفى عاوزة منك اية

ههههه اضحك عادى خليها تضرب وتلاقى مش هتلاقى الا الطناش منى

اتركها واردد

سبحان مغير الاحوال

زميلة لى تقرأ فى المصحف وتتمتم بأدعية

نيرمين فطرتى

لا شكرا مش بفطر

طيب براحتك

زميل لى ينادى على

نيرمين عندكوا سكر عاوزين نعمل شاى

ايوة تعال واتوجة لزميلتى حامله القرأن

ابلة من فضلك كان فية هنا كيس سكر انا جايباة من فترة

اة اهوة تردد هى

طب عاوزة نصة للولاد فوق

لا سيبك منهم اللى عاوز يروح يشترى

ياستى مترديش سائل همة مش محتاجين بس الموجود عندك كتير ومفيش مشكلة نديهم

نيرمين تنطق اسمى بصوت جهورى

امبارح تجيبى فطار لنا وتتطلعى الدور التانى تقولى انة عندنا فطير مشلتت تلميلنا الدور كلة والنهاردة السكر

طب وفيها اية دا الاكل بيزيد بأجتماع الناس مش بينقص اردد انا

لا ياستى ترد/انا مبحبش لا اسلف ولا ااكل حد

اخذ كيس السكر واتوجة للباب لأعطية لزميلى وأردد

سبحان مغير الأحوال

اترك عملى وأتوجة لتاجر كنت قد تحدثت معة حول بضاعة لشرائها منة

مساء الخير يا فندم

اهلا يا استاذة

اخبار البضاعة اية

انا زعلان منك جدااااا

لية فية اية

قلتى لبنت عمك انك هتشترى منى وسايبالى عربون

طب ودة فية اية مش فاهمة

لا ابدااا اصل هى اتصلت واتخانقت معايا انا بصراحة فهمت انها غيرانة منك لأنها طلبت تشاركنى فالبضاعة قبل كدة وانا رفضت

اردد انا طيب وانا مالى انا علاقتى بيك شغل علاقتك بيها انك عاوز تتجوزها انا مالى باللى بينكم

لا مفيش بس هى اتخانقت وحذرتنى اتعامل معاكى قالت انك عصبية وشديدة ومش هتفوتى غلطة لو حصل خلاف

اردد بص يا استاذ انا مبحبش العلاقات المتشابكة الشغل شغل وانا مليش فالدوشة اقولك بلاها البضاعة شكرا سلام

لا طيب انتى زعلتى

اردد لا ابدا بس انا مبحبش الكلام الكتيربدون فايدة

طب ياريت متقوليلهاش انى قلتلك حاجة

لا متقلقش ربنا يهدى الجميع بكرة هعدى اخد فلوسى مقدم البضاعة وشكرا

سلام

سلام

واردد بهمس سبحان مغير الاحوال

الموبيل يرن

ايوة ازيك ياحبيبى

اهلا ياحبيبتى اخبارك اية

بخير الحمد لله

اية مكلمتنيش لية امبارح

نمت بدرى اسف بجد

هههههه اضحك نمت بدرى ولا خرجت مع صحابك

لا نمت بدرى انتى مش مصدقة لية

واسمع وصلة من الصوت العالى والاتهامات بنقص الثقة والشك وبأنى مبصدقش الا نفسى

اصمت واردد اسفة طيب لما تقعد ع النت رنلى سلام عشان انا مروحة من الشغل

طيب ياحبيبتى سلام

انظر للموبيل فى يدى

الله يسامحك يا طارق/صديق مشترك لنا لا أثق بة كثيرا /

اتصلت مخصوص امبارح عشان تطلب ورق خاص بالشغل وتقولى انكم فالسينما سوا انت وهوة

ودلوقتى بيكدب علية ياترى كنتم مع مين وفين خروجة عزابى ولا تشكيل

اتمتم سبحان مغير الاحوال

ماما ماما سماح هنا

امى /لا مش عاوزة اقابلها

ماما انتى حاجة بيت الله انزلى للبنت جايالك عاوزاكى فمشكلة

امى /دى بنت قليلة الادب بتتخانق ع ورثها وابوها لسة مماتش وعيان

ياماما البنت بتقول ان اخوكى كتب الارض والبيت بأسم مراتة الأولى وساب سماح عشان من زوجة تانية

خرجها من الميراث ودى جاية تستنجد بيكى

أمى /كذابة انا سألت اخويا قاللى وحلفلى انة معملش كدة تنادى بصوت عالى تسمعة سماح

قوليلها تروح تلف ع الناس

ترفع قضايا

تروح للعمدة

خليها تشوف هيعملها اية دى فضحتنا وانا مش عاوزاها فبيتى أخويا مبيكدبش فهميها كدة ورثها محفوظ واخويا مبيكدبش

انزل لأرى الدموع ع وجة سماح

تردد طب قوليلى اعمل اية يا بنت عمتى والنبى اروح للعمدة مش عاجبهم اجى لعمتى تطردنى والله كتب وبيكدب ع عمتى

اردد معلش ياسماح اصبرى لما العيا يخف من علية وروحى دلوقتى وانا بعدين هكلمها

اقبلها وتمشى ودموعها تسبقها

بعد ايام يموت خالى

بعد شهر من الوفاة

ماما مالك رايحة فين كدة

شفتى يانيرمين شفتى اخويا كدب علية ومنع البنت سماح الغلبانة من الميراث ربنا يسامحة

طب وانتى رايحة فين

رايحة للعمدة يشوفلة حل او نرفع قضية دة حق ولايا وانا مش هسيبة

انظر لها واردد

سبحان مغير الأحوال

لماذا نتعمد الكذب والمراوغة ويصبح ظاهرنا غير باطننا

لماذ اصيب المجتمع بهذا المرض الخطير من الكذب وهتك الاعراض ع الارصفة والطرقات

لماذا لم نعد نملك تلك الطاقة من الصدق والصراحة واحترام الاخرين

لماذا اصبح قليل الادب رمز وسئ السمعة مثل

واخيرا لماذا فقدنا الحب والتسامح والرقة وحب مساعدة الأخرين بداخلنا

اسئلة تؤرقنى وتجعلنى دوما انظر امامى وخلفى خوفا من طعنات البشر

حين تراقصت حروف الكى بورد وتشكلت لينبت منها انتم فقط انتم

لطالما أعتبرت الحلم منفذا للأمانى التى لا نستطيع تحقيقها فى الواقع ولطالما شعرت بأن الحلم هو ضالتى فى البحث عن مخرج لمشاعرى ومهاتراتى وطلباتى اللأمادية فى عالم مادى بحت
ولذا واليوم حين اقترن الحلم بالحقيقة حين رأيت تلك العقول والقلوب التى تشعر بالوحدة وتمتلئ بأفكار وأحلام وعالم يخصها وحدها دون غيرها حين رأيت حروف الكى بوردات التى يستعملها كل مدون ع جهازة تتراقص امام عينى
حين رأيت الكلمة تلتقى فى رومانسية شديدة مع الفعل وتقترن بالصوت
حين نظرت فى عيون من التقيتهم اليوم ورأيت الأحلام تتراقص أمام وجوههم المفعمة بالرغبة فى التغيير ووضع علامة وبصمة فى تلك الحياة الفارغة من كف صديق مؤتمن او زوج حبيب
حين رأيتكم اليوم يا أعزائى المدونين
رأيت الحلم بأنى ابدا بعد اليوم لن اصير ولن تصيرون بل لن نصير مجرد احلام
فكلما قرأت كلمة لديكم أو قرأتم كلمة لدى فلنتذكر جميعنا حركاتنا وسكناتنا اليوم وكل هذا الحب وكل هذا العالم الذى اخرجناة من الحلم وصار اليوم حقيقة
سعيدة بكم ولكم

حمدالله ع السلامة ياللى عندك بنلاقى أجمل أبتسامة

لو شاطر... تعرف تعيش فى مصر بـ 1000 جنيه ! ! !

البيان
مصروف يومي
مصروف أسبوعي
مصروف شهري
ملاحظات
عيش بلدي
1

30شهريا
بس لازم تلحق دورك فى طابور الفرن وتلحق شغلك فى نفس الوقت ربنا معاك
حليب
4

120شهريا
عدد واحد لتر يومياً ويارب ميطلعش بودرة سيراميك ويكفى العيال
فول

8
32شهريا
كيلو فول اسبوعيا يعنى 125 جرام يوميا رضا والحمد لله
جبنة بيضاء

20
80شهريا
كيلو في الأسبوع 125 جرام يوميا انت عايش
بيض

5
20
عبارة عن 10 بيضات فى الاسبوع يعنى لو اربع افراد يبقى بيضه ونص يوميا للاربعة
خضار

10
40
عبارة عن صنف واحد بس + كيلو طماطم + لمونه وحزمة جرجير اسبوعيا
فواكهه

5
20
عبارة عن كيلو برتقال أو قشر موز مرة اسبوعيا علشان العيال تفتكر اسمة
شاى


10
لزوم الكيف اللى بيذل والضيوف الرزلين
سكر

4
16
عدد واحد كيلو اسبوعيا مش بقولكم الكييف يذل وضيوف معندهمش دم
ارز

4
16
عدد واحد كيلو اسبوعيا للعائلة كلها يعنى 125جرام يوميا متوسط الفرد 40 جرام
زيت

10
40
لتر اسبوعيا علشان تشرب بق على الريق يزيت معدتك 000 يستعمل كبديل للخضروات
مكرونه

8
32
عبارة عن عدد 4 كيس 400 جرام اسبوعيا 0000 خلى العيال تنبسط
دجاج

20
80
عدد واحد دجاجة اسبوعيا للعائله 000000 اظن معقول
لحم

30
120
عدد واحد كيلو لحم اسبوعيا لزوم صنف الخضار واللمونه وحزمة الجرجير 000 الف هنا
بقوليات


10
عبارة عن كيلو واحد بس شهريا ونقى اللى بتحبه براحتك ( عدس - لوبيا - فاصوليا )
توابل


10
عبارة عن دقيق + ملح + كمون + فلفل + كسبرة + وممكن تديها خل براحتك
صابون


15
عبارة عن صابونه واحدة للحمام + صابون مواعين + مسحوق للملابس ( النظافة عموما )
مواصلات
2

60
بعد طابور الفرن تركب أتوبيس الهيئة ذهاب وعودة وبهدله وفرهده لفرد واحد يوميا
حلاق


10
عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )
مدرسة

10
40
عبارة عن مصروفات المدرسة + مصروف العيال اليومى + كراسات واقلام وجلاد 00ألخ
دكتور


30
نمرض بالدور طبعا عدد اربع افراد مرة واحدة للفرد كل 4 اشهر وربنا يستر
ادوية


50
أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه
تليفون


10
اشتراك الهيئة هنرد بس ومش هنتكلم معدش ينفع كلام
مياة


10
للاسف لازم نشرب مياة ملوسة بالمجارى
غاز


5
الحمد لله غاز طبيعى الله فى عون اللى عنده انابيب ( 10 جنيه للانبوبه ) وممكن تطلع فاضية
نور


20
لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع
قمامة


10
اجبارى طبعا ومن الواضح ان العشة دى مفيهاش اكل اساس يبقى القمامة هتيجى منين
بواب


15
مهو من حقه يعيش هو كمان لو عشر شقق يبقى 150 جنية شهريا خليه يهيس
صيانة


30
لاصلاح الاجهزة بالدور غساله - سخان - بوتجاز - مروحه - تلاجة - سباكة - لمبات انارة الخ
ملابس


100
عبارة عن الصيفى والشتوى داخلى وخارجى واحذية وشربت وكلونات واتصرف بقى
الاجمالى

1081
اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض
ايجار الشقة طبعا قانون جديد وللاسف ملهوش قانون كل واحد وبخته ومش هنحسبها كل واحد يقعد عند امه وبالمناسبة
عيد الام ربنا يخليها ويديها الصحه
0
كل سنة وهى طيبة
عيد الكحك
مضر وملهوش لزمة
0
كل سنة وانتم طيبين
عيد اللحمة
مضر وملهوش لزمة
0
كل سنة وانتم طيبين
حلاوة المولد
السكر مضر وملهوش لزمة
0

لا استنوااا لسة
أخ خ خ نسيت احسب زكاة الفطر بس مش عارف هدفع ولا هأخد ؟
عموما هقولكم على قائمة الممنوعات والمحظورات 000 متقربوش منها علشان تعرفو تتنيلو وتكملو الشهر
ممنوع عنك الحلاوة والمربى والعسل والزبدة وكافة انواع الجبن عدا ماذكر فى التعيين ( الجبنه البيضا )
المعلبات تونه بلوبيف لانشون سالمون فول وطبعا البسطرمة والزيتون والمخللات ممنوووووووووووووووع
اوعى قلبك يحن لعيل من العيال وتجيبله كيس حاجة حلوة او زجاجة مياة غازية ونايتى عسلية بسكوت شيكولاته اياك ومنتجات العيال الصغيرين حتى لو حليب بالفواكهه او لبانه وجيلى كولا وهو يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل
احظر اللحوم بانواعها البفتيك والاستيك والرقبة والموزة واللوزة كله كلام فاضى خليك فى تعيينك الاسبوعى
ومتنساش ان البانية والفليه من الممنوعات ومتقربش ومتمشيش فى الشارع جنبك كنتاكى وهاردييز وهاربيز وتكه ومؤمن وكوك دور واياك من السندوتشات عموما زى الطعمية والبطاطس والبذنجان الحجات الحلوة دى مش مطلوبه تعملك حموضه وهتحتاج فوار واحنا منعناه مع الدوا وطبعا مش محتاج اقولك وافكرك انك ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ
خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بانواعها يالعربى انت زى العصفورة تاكل عيش ودنيبة رز وتشرب ميه عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع ياسيد
اهم حاجة مترحش لدكتور متجبش مدرس ولا ادوية واياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم
طبيعى انك مش هتقرب من الفواكهة خالص البرقوق المنجو البطيخ الفراوله الكيوى الخوخ العنب التفاح حتى الكاكا والحرنكش والنبأ والقصب والدوم والتوت ممنوع سيادتك
وطبعا معجون الاسنان والحلاقة والشامبو والبلسم كلها رفهيات ملكش فيها زى البصل والتوم والبطاطس كلها اساسيات ملكش فيها برضه ومتنساش تبعت الميل للناس اللى تعرفهم هما اكيد زيك محتاجين شوية نظام مش اكتر هما غلابة وفكرهم يقولو لعيالهم لو شافو مسلسل فى التليفزيون مليان بهرجه ان دى قصص خياليه كانت فى العصور القديمة فترة من الزمن و ان الواقع زى ماهما شايفيين حتى الاعلانات حاولو تفهموهم انها مجرد الوان مبهرة وتكنولوجيا فى علم التصوير وتخيلات ممكن تحصل بعدين زى ماحصل فى امريكا وكندا وفرنسا والمانيا واوربا كلها وان الحجات دى علشان لما الناس دى يجو عندنا يلاقو منها ويعرفو يعيشو هى مش لينا دى ليهم هما اصحاب البلد ولازم ينبسطو
عموما لو على الكلام مش هيخلص روح الحق طابوووووووووووووووووووووووووور العيش تبقى نصيبة لو عطلتك ورحت لقيت الفرن شطب

كل سنة وانتم طيبين

أم السيد ومثلها كثيرون!!!.

أم السيد فلاحة بسيطة تلبس عباءة سمراء تغير لونها بمضى الزمن والأحداث وجهها دائما ضاحك ومبتسم برغم انك لا تسمع منها الأ أنين الشكوى كل دقيقة من الغلاء والناس وصعوبة العيش والمعاملة السيئة التى تتلقاها من ابنتها البكر والتى لم تتزوج للأن وتعيش عالة عليها برغم انها تملك محلا خاصا بها لبيع الحلوى والهدايا

أشاهدها يوميا وهى تحمل صينية الطعام لأبنتها فى محلها وأحيانا كثيرة ارى دموعها تنهمر وهى عائدة فالشارع وتمسك بكم عبائتها لتمسح هذا الكم المتسارع من الدموع بعد ان تنهرها ابنتها لمنظرها او لنوعية الطعام البسيطة بساطة أم السيد

وتحدونى دائما تلك الرغبة فى الذهاب لتلك الفتاة لأنهرها ولكننى اتوقف فأنا ادرك مدى حبها لأبنتها وتحملها لسوء المعاملة بحب وصبر شديدين أم السيد لديها ولدين أخران يعملان فى أحد مصانع العاشر من رمضان ويحضرون للبيت ليلا منهكين متعبين ويتقاضى كل منهم 200 جنية لا يعطى أى منهما لوالدتة منه شيئا

عاوزين يتجوزوا ياابلة ميرمين واهى ماشية من غيرهم الحمد لله

أم أحمد فلاحة تبدو فى أوائل الثلاثينات ويكسو وجهها طابع من الحزن والكأبة دائما ولا تجدها الا وهى تجلس فى صمت امام باب منزلها تتحدث مع جاراتها عن ابنها الوحيد الذى رزقت بة ويصرعلى الكلام عن السياسة والأنتماء لحاجات والنبى مااعرف مالها واساميها بس حاجات تودى فداهية

وتتنهد بين الكلمات وبعضها لتدعو لة بالهداية وأطاعة أوامرها فبعد خروجة من المعتقل بسبب اللى مش عارفاة دة اللى بيعملوة فالجامعة اللى أسمة دة اجتماع الطلبة وتقصد اتحاد الطلبة واشتراكة فالمظاهرات وتحلف بالله صادقة انها حلفتة ع المصحف لا يمشى فمظاهرة ولا يقرب من الأجتماع دة وألا تفضل غضبانة علية العمر كلة

ثمانية فتيات أصبحن زوجات ولكل منهم خمسه اطفال لذا فالمحصلة اربعون طفلا يتحركون حولهم فى غوغائية وصخب شديدين غير مدركين بأن جدهم قد توفى منذ ايام قليلة هؤلاء هن بنات خالى لم يتموا تعليمهم وتزوجت كل منهم فلاحا مثل ابيها وأنشغلت فى تربية الأولادوفلاحة الأرض

شاهدت فى الأيام الثلاثة للعزاء الكثير والكثير من هذة النوعيات البسطة الخالية من أى تفكير سوى لقمة العيش وانجاب الأطفال

واأسعار والحياة السياسية بالنسبة لهم شئ غامض وكلمات مبهمة تفسيرها يعنى ببساطة الدخول فى الممنوع

والحال لا يتغير كثيرا بالنسبة لأزواجهم

انا اعيش فى قرية والدى منذ عام تقريبا فقط وربما لم احضر لها فى حياتى قبل استقرارى فيها سوى مرة او مرتين فى عمرى كلة

ولكننى فى هذا العام ايقنت أننا فى محاولاتنا اللامجدية للتغيير ع الصعيد السياسى او المجتمعى سنواجة بالتأكيد هذة النوعيات المصرية الخالصة من البشر اللذين لا يفكرون الا فى هذة اللقيمات التى تقيم أودهن ومشاكلهم الشخصية مع أبنائهم

ربما لهذا تزداد قناعتى مع الايام بأن التغيير لن يحدث بسرعة مهما ارتفعت اصوات الرافضين ومهما زادت اعداد المنتمين لحقوق الانسان او الأحزاب أوالناشطين

لن يحدث ابدا أى تغيير ألا لو استطعنا ان نفكر كيف نصل بأفكارنا وبتوجهاتنا الى تلك الطبقة الكادحة من المجتمع المصرى والتى تمثل اعدادا غفيرة من مجتمعنا المتنامى بصورة بشعة سنويا

عمال غزل المحلة والمضربين من الضرائب العقارية والعمال الممتنعين عن العمل فى كل مكان من ارض مصر مطالبهم واحدة لقمة العيش وهم يجدون أن ناقشتهم بعقلانية أن لقمة العيش هى السياسة وأن الحكومة مقصرة ولكن قناعاتهم لا تدفعهم الى الثورة ولا الى التغيير فقط البحث عن لقمة العيش دون التظر لأحوال البلد عامة ودون التفكير فى السياسة أوالثورة

وربما كا ابرز تعليق ع ذلك ثلاث كلمات نشرتهم جريدة الدستور الاسبوع الماضى

الشعب المصرى لا يفكر ولا يتحدث الا ع

الغلاء الخبز ارتفاع اسعار المواصلات

يتحدث فقط!!!!!!!!!!!؟؟انظروا معى للتعبير يتحدث عن وليس يشجب او يعترض او او او

يثور لا يعتصم نعم يسجن لا يفكر فى لقمة العيش طبعا يظن ان تغيير النظام القائم هو الحل لا

وحتى يتغير ذلك الرمز الذى يميز مصرالفلاحة الواقفة تتطلع فى صمود وقوة وصبر وأناة شديدين للمستقبل وهى تضع عباءتها فوق رأسها لتتقى حرارة الشمس وتقلبات الأجواء وتحمى نفسها وتحتوى صغارها من تحتها

الى أن يتغير رمزك يا مصر او يتغير شعبك الصابر الصامد القدرى الطالب فقط للقمة عيشة ولقمة عيشة فقط

الى ان نصبح رمزنا بمثل افكار ربع المجتمع الثورى وليس ثلاثة ارباعة البسيطة

لن نتقدم ولن نتغير

لن نتقدم الا لو استطعنا الوصول لأمثال أم السيد وبنات خالى الثمانية وأم أحمد ووالدة أسراء عبد الفتاح وامثالهم كثيرين وأفهمناهم معنى توحيد قوى الشعب وأرتباط المرتبات بالأسعار وكيفية الرفض والشجب والمطالبة بالحق المهدر

تزداد قناعتى كل يوم بأننا شعب مسالم نسير بسرعة السلحفاة نحو التغيير لأننا وبصدق لا نتوجة للطبقة التى من المفترض التوجة لها وأقناعها بما يجب أن يحدث ويكون

خواطر مرت بعقلى وأنا أنظر لعنوان ضخم فى أحدى

الصحف

التغيير قادم لا محالة وبسرعة

الصور من مدونة مواطن مصرى واخد ع قفاة

http://www.egymasr.com/?m=200612

حواديت ام السيد والحكومة2

ابلة ميرمين ابلة ميرمين
ايوة ياام السيد
البقاء للة فخالك
شكرا ربنا يخليكى
عاوزة اقولك حاجة
قولى ياام السيد
لا بس تعالى قربى منى فودنك يعنى
ها عاوزة اية قولى انا رايحة العزا
انا دعيت انبارح الفجرية والنهاردة الصبح سمعتهم فالسويقة بيقولوا ان العيش والسكر والزيت هيغلوا تانى انا قلتلك ياابلة ميرمين ربنا غضبان علينا قوى تعرفى والله الحكومة غلبانة احنا وحشين وحشين قوى ياابلة مع بعضياتنا صدقينى
ماشى ياام السيد انا مش هعرف اقنعك بس لما افضى هنقعد سوا نتكلم
طب حاجة كمان
اية قولى فسرى اردد انا اللى جبتة لنفسى
هوة اية الفيسبونك دة اسم سجن دىولا شتمة ولا اية
مين اللى قالك ع الكلمة دى
الواد ابنى لما قلتلة انى دعيت ع الحكومة قاللى اوعى ياامة تكونى انضميتى للفيس بونك اية دة ياابلة
ام السيد هروح العزا وبكرة هنقعد وافهمك سلام
سلام يا ابلة بس والنبى اوعى تكونى انتى من بتوع الفيس بونك الواد ابنى بيقول دة خطر قوى واحنا بنحبك
سلام ياام السيد
سلام يا ابلة

حواديت أم السيد والحكومة

أم السيد /مساء الخير يا ابلة ميرمين مسا الخيريا ام السيد ازيك اخبارك اية
أم السيد /والنبى تعبانة يا ابلة عندى ضعف دم يعنى اية ياام السيد قصدك فقر دم
أم السيد /اهو هوة دة ياابلة أم السيد /ماهو مفيش غذا ياابلة والنبى كل يوم بطاطس مقلية وكوسة حتى البتنجان غلى والنب وبليل لما احب اكل حاجة مسكرة بسف شوية سكر الا يكون السكر هوة اللى تاعبنى ياابلة؟؟
اة ياام السيد بطلى سف سكرهوة اللى بينشف ريقك اشترى عسل اسمر احسن
أم السيد /والدكتور العبيط بيقولى كلى كبدة هوة احنا عارفين ناكل العيش لما ناكل الكبدة؟؟احسن برضة السكر غالى والنبى دانا شارية ب بجنية عسل اسمر والنبى هاكلة احسن وارخص برضة
أم السيد /انتى عارفة ياابلة انا مباكلش اللحمة الا من العيد للعيد والنبى والعيش بتبهدل عشان اجيبة والنبى امبارح كان اسود كدة لون جلابيتى دى
معلش يام السيد ربنا ع القوى ادعى ع الحكومة الفجروانتى بتصلى
أم السيد /لا عيب ياابلة والنبى الحكومة مالها دول الحرامية اللى سارقينا حرامية مين ياام السيد...؟؟؟؟؟؟؟؟
أم السيد /الراجل بتاع الوكالة اللى بجيب منة شوية الخضاروالواد بتاع المية اللى بيجيبلى علية مية 75ج كل شهروالواد بتاع العيش كلهم ياابلة والله حرامية ياام السيد ماهو الحكومة اللى مغلية الاسعار مش الناس دى
أم السيد /لا ياابلة اسكتى الحيطان لها ودان لا والله احنا ياابلة اللى مبنخافش ع بعض وبنسرق بعض والغنى بيدوس ع الغلابة اللى زينا بالك ياابلة اصل احنا كتير هتعمل اية الحكومة يعنى فينا احنا كتير ياابلة طب برضة ياام السيد الحكومة ليها دوروالحرامية الكبار همة اللى سارقينها
أم السيد /ابلة والنبى انا غلبانة ومليش فالكلام عن الحكومة دول ياابلة بيسمعوا دبة النملة اة والنبى الواد ابن ابو على جارنا ربالة شعرتين فوشة مسكوة والواد ابن سامية بياعة اللبن محدش عارف طريقة
أم السيد /ابلة مرمين تعالى اقولك فودنك كلمة ها قولى ياام السيد ادعى بليل فسرى اقو ل اية ؟؟؟؟؟؟