كل سنة وانتم جميعا بخير وحب

كل سنة وكل زوار مدونتى وكل المدونين بمصر بألف خير وحب وسلام مع النفس ومع الأخرين

دة اولا

ثانيا السؤال اللى عمالة اسالة لكل اصحابى وقرايبى هروح فين النهاردة

ولسة لغاية الأن والفجر اهوة بياذن بسألة لنفسى هروح فين النهاردة ؟

تيتة قالتلى تعالى عندنا

وعمتو قالتلى تنورينا

وبابا قاللى تعالى نزور سوا قرايبنا

واخويا قاللى تعالى معايا اسماعلية

وصاحباتى قالولى هنستناكى تقعدى معانا

وانا قررت اناممممممممممم

ايوة هقضى العيد فالسرير جنب التليفزيون ولوحدى ولا هخرج ولا هعيد ع حد

طيب والنبى اخرج وازاى وفين لوحدى

اولادى مسافرين الغردقة مع والدهم وزوجتة واخواتهم

ثلاث ايام

وع رأى المثل الفلاحى لبسى ياخايبة للغايبة

لف وطلوع روح نشترى لبس وفالنهاية قرروا الأندال يعيدوا فالغردقة

والقرار بتاعهم لأننا ديمقراطيين

بين قوسين أسوأ نظام فالعالم هوة الديمقراطية الديكتاتورية دى اختراع جنان واللة

كل صحابى عندهم ولاد ومينفعش اروحلهم لوحدى وكل مكان هروحة هيسالونى فين الولاد فين الولاد

وانا طبعا هعيط لاننا مبنبعدش عن بعض خالص

يبقى اخدها من قصيرها واقعد فالسرير لغاية ما يرجعوا

مش قلتلكم قبل كدة انا لازم اتجوز

أو ولادى يكبروا ويتجوزوا ويريحونى من أرتباطى بيهم

أو أروح لدكتور نفسى يعالجنى من حبهم

كويس

عندى تلات ايام بلياليها اقعد امخمخ فحل من التلاتة

هههههههههههههههههههههههههههه

كل عيد وانتم جميعا بخير